Campaña para pedir a inclusión do galego como lingua preferente nos portátiles das escolas

luns, 25 de outubro do 2010 Fernando Sarasketa

As aulas do sistema educativo galego están neste intre en proceso de informatización, en boa medida a través do proxecto ABALAR da Consellería de Educación, unha iniciativa que entre outras cousas inclúe a distribución de milleiros de ultraportátiles para o noso alumnado. Pois ben, dada a importancia da medida para a aprendizaxe dixital de centos de miles de rapazas e rapaces do noso país, e dado o necesario que é contribuír a identificar a nosa lingua coa vangarda da comunicación e do lecer (co fin de preservala), diferentes colectivos galegos están a pechar fileiras arredor dunha petición común: a inclusión do noso idioma como lingua preferente na configuración dos devanditos ultraportátiles.
Así se vén de posicionar, precisamente, a CiberIrmandade, que puxo en marcha na súa web unha campaña para solicitarlles aos responsables da iniciativa ABALAR a habilitación da nosa lingua nos portátiles educativos, amais de que se poidan ofrecer outras linguas alternativas. A iniciativa de CiberIrmandade ten o seu xermolo na presentación oficial dos devanditos equipos, que segundo a web de Galicia Confidencial incluían só inglés e castelán de xeito preinstalado. O colectivo galeguista en liña tamén lle solicita á Xunta que desminta a información que apuntaba ao papel secundario do galego nos equipos.

PUBLICIDADE