Campaña en liña para pedirlle ao Concello de Sanxenxo unha versión en galego da súa web

A participación na Rede das administracións galegas non sempre se desenvolve seguindo criterios lóxicos de comunicación. En ocasións, mesmo semellan estar facendo o seu traballo dende ben lonxe, falándolles a outros, malia estar (física e virtualmente) tan preto coma calquera outra. Nesta liña é onde semella inserirse o Concello de Sanxenxo, un goberno local que leva xa uns cantos anos dando poucas probas de apoio á Rede galega, ofrecéndose á comunidade internauta cunha páxina que en aparencia ten versión na nosa lingua pero que logo só actúa de xeito operativo en español. A achega galega, deste xeito, fica coma unha desas obras en construción que existe en tódalas vilas e cidades e que nunca se dá rematado.
Segundo se conta na CiberIrmandade, dende a que xa puxeron en marcha unha nova iniciativa para que Sanxenxo varíe o seu rumbo comunicativo na Rede, que un concello aposte pola lingua do país no que se insire é sempre unha estratexia enriquecedora, se teña a ideoloxía que se teña.
“Sabemos que é posible para este concello galego ter unha páxina web na lingua propia de Galiza, e que tampouco é ningunha utopía ter a nosa lingua como opción predefinida”, manifestan dende o colectivo internauta e cultural, ao tempo que animan á comunidade galega en liña a facerlle chegar á alcaldesa de Sanxenxo unha solicitude dixital para a posta en marcha dunha versión no noso idioma da súa comunicación na Web.