Bota a camiñar co apoio de 600 profesionais unha plataforma de receitas médicas en liña
xoves, 23 de abril do 2015
Estes días estase a
presentar en Madrid a que sería, a xuízo dos seus impulsores, a
primeira plataforma estatal de prescricións médicas en liña:
Receita Médica Online.
O servizo, posto en marcha por un equipo de médicos, farmacéuticos
e informáticos, diríxese a facilitar a renovación de receitas aos
profesionais sanitarios do sector privado e aos propios pacientes.
Máis en detalle, a ferramenta permite a comunicación dos
facultativos cos doente por vía telemática, amais de posibilitar a
renovación das prescricións médicas sen necesidade de
desprazamentos (enviándose ao dispensario que se desexe dispoñendo
así do medicamento xa preparado). Segundo informan os responsábeis
da plataforma, “en 15 días de funcionamento, xa solicitaron
inscribirse nela até 600 profesionais sanitarios”.
Un dos obxectivos deste
novo sistema é “solucionar os problemas cotiáns de axenda dos
médicos que en moitos casos enchen a súa consulta con doentes
crónicos que só precisan unha nova receita para continuar o seu
tratamento”, informan os impulsores do servizo, entre os que se
conta o doutor Roberto Medina, experto en aplicacións de eSaúde da
Universidade Complutense de Madrid, que engade “calquera médico
colexiado pode rexistrarse sen custo e comunicarse vía telemática
co seu paciente para prescribir os medicamentos que previamente se
lle indicaron”. Por certo que unha vez autorizada a receita
electrónica, envíaselle ao paciente ao seu smartphone,
tableta ou computador para que poida imprimila e retirar o seu
medicamento en calquera farmacia de España.
A ferramenta Receita
Médica Online adapta coas súas particularidades certas metodoloxías
de traballo propias de iniciativas como o portal estadounidense
Surescripts, que conecta
900.000 profesionais sanitarios con 220 millóns de pacientes (as
súas 700 aplicacións producen 6 billóns de transaccións médicas
en liña ao ano).