As vendas do Nexus One continúan a un ritmo comedido

A consultora Flurry volve a analizar as vendas do móbil Nexus One tras 74 días á venda por parte de Google, comparándoas cos resultados do primeiro iPhone de Apple e co popular (nos EE.UU.) Motorola Droid. Elixiron os 74 días coma data para facer este contraste porque foi cando o iPhone orixinal superou o seu primeiro millón de unidades vendidas, e serve para ilustrar a decepción que para moitos supón que o Nexus One teña que conformares con vender só 135.000 unidades no mesmo período de tempo, o que non parece provocado polo seu sistema operativo, posto que o Motorola Droid tamén funciona con Android e superou nunhas 50.000 unidades as vendas do iPhone. Entendemos así que o marketing é fundamental para unhas boas vendas, e o feito de que o Nexus One estea dispoñible a través de poucas operadoras de telefonía móbil (e aínda non estea comercializado oficialmente en Europa), só poida mercarse en liña, careza de publicidade nos medios tradicionais (polo que é descoñecido polo grande público) e teña un servizo de atención ao cliente pouco satisfactorio son elementos que non contribúen a que o móbil promovido por Google teña unhas boas vendas, o que podería ser a intención da compañía, pois non hai que esquecer que o negocio de Google está no sistema operativo e non nos terminais, de xeito que poderían perseguir unhas vendas só moderadas para evitar lesionar as vendas dos seus socios (fabricantes que están a adoptar o Android coma sistema operativo, que no caso de que o Nexus One tivese unhas vendas moi fortes veríanse ameazados).
No tocante aos problemas de operadora, dende Google veñen de anunciar unha nova versión do Nexus One que será compatible coas redes 3G de AT&T (EE.UU.) e Roger Wireless (Canadá) xa que as primeiras versións do terminais operaban en frecuencias que, aínda que son habituais en Europa, nos EE.UU. non estaban tan xeneralizadas, de aí que nas vindeiras semanas poderemos agardar un importante crecemento das vendas do terminal fabricado por HTC e distribuído por Google.