As novas correntes e feituras do noso audiovisual, polo miúdo no Festigal
mércores, 23 de xullo do 2014
Este 25 de xullo, Día da
Patria, celébrase en Santiago unha nova cita do Festigal,
unha cita senlleira coa música galega e con tódalas expresións
artísticas e culturais que abeiran e compleméntanse coa nos
corrente musical. Polo tanto, haberá audiovisual e dentro deste
eido, audiovisual de vangarda. De feito, Festigal 2014 terá o seu
ingrediente de reflexión arredor das novas tendencias e metodoloxías
de crear, rendibilizar e distribuír filmes, documentais ou series.
Máis polo miúdo, proxectaranse no espazo audiovisual de Festigal
tres pezas “de interese para a divulgación”. Falamos de A
Fazaña da Liberdade, un documental
sobre a vida de Alexandre Bóveda; Artemia,
unha webserie
impulsada pola plataforma dixital
Irmandade TV; e IES Pazombies,
unha curta sobre a lingua, feita por estudantes.
A
Fazaña da Liberdade é
un documental dirixido por Senem Outeiro sobre a vida de Alexandre
Bóveda. Analízase o seu papel no desenvolvemento do nacionalismo
galego da década de 1930, especialmente na configuración do Partido
Galeguista, e a súa faceta como deputado en Madrid até o golpe de
Estado fascista e o seu posterior asasinato.
IES
Pazombies é
unha curta realizada integramente por estudantes do IES As Neves, que
fai un interesante xogo sobre o uso dos idiomas e convértese nunha
parodia sobre a situación actual que vive a lingua galega nos
centros de ensino da Galiza.
Polo que
atinxe a Artemia,
sinalar que é
unha webserie
desenvolvida dende IrmandadeTV e dirixida por Darío Autrán. O
argumento é este: Marcos
(Gustavo Freire) perde o seu traballo como xornalista logo da ruptura
coa súa moza Laura (Bea Meilán), que marcha con Esteban (Ernesto
Delgado), irmán de Marcos. Así, a partir dun crime, a trama abre e
anoa en arqueoloxías e dinastías familiares, nunha loita por
coñecer o mundo real, que vai e vén nunha combinatoria de escenas
veloces e de lenta construción nas emocións dos personaxes.