As imaxes achegadas pola NASA á Rede, ao detalle este venres na Coruña
xoves, 22 de xaneiro do 2015
Este venres 23 de xaneiro
o MUNCYT da Coruña acolle unha charla do físico e divulgador
científico Dosi Veiga, baixo o epígrafe APD NASA 2014, Un ano de
astronomía en galego. A cita, que comezas ás 19.30 e vén da
man da Agrupación
Astronómica Ío, representa a introdución na nosa terra dunha
práctica que se leva a cabo dende hai anos en Estados Unidos e que
consiste en avaliar, cada aninovo, os acontecementos máis
importantes en materia de astronomía rexistrados os doce meses
previos. Acontecementos que se expoñen a través das imaxes
achegadas ao sitio web Astronomy
Picture Of the Day (APOD) da NASA
Trátase dunha páxina
posta en marcha dende 1995 dende a que se pendura cada día unha
fotografía de temática astronómica comentada. O resultado, ao
remate dun ano, é unha completa e variada escolma de imaxes e
rexistros que, segundo nos lembran dende a Agrupación Ío, fornece
un “percorrido fascinante polos últimos achados e novas deste eido
da ciencia”. Este percorrido soe vir da man de Jerry Bonnel, que é
un dos responsábeis do devandito sitio web da NASA e que con cada
remate das festas de Nadal avalía os recursos xerados durante o ano
previo nunha charla en Nova York.
Pois ben, en adaptar esta
práctica de aninovo á nosa terra e ao noso contexto é no que
consiste, en liñas xerais, a charla deste venres. O relatorio virá
importado por Dosi Veiga, tradutor ao galego da devandita web e
membro das xuntas directivas da Asociación
Galega para a Comunicación e a Cultura Científica e Tecnolóxica
e da Federación
de Asociacións Astronómicas de España. A actividade, dirixida
ao público xeral e de entrada libre, forma parte do programa do Ano
Internacional da Luz 2015, que a UNESCO declarou aberto nun acto
celebrado en París este mesmo luns.