Áreas e Abertis achegan Wi-Fi de balde nas áreas de servizo dunha serie de autoestradas
mércores, 1 de abril do 2015
Semella que o servizo
Wi-Fi para as autoestradas estatais vai camiño de ser unha
realidade. Ou polo menos unha realidade para algúns condutores, os
que teñan o privilexio de circular por determinados treitos en
renovación da rede viaria. Segundo puidemos saber, Áreas
e Abertis veñen de rematar un proxecto que incluíu a integración
dun tecido Wi-Fi de acceso público e de balde nas áreas de
servizo de diferentes autoestradas de ámbito estatal. O obxectivo,
amais de achegar un mellor servizo, é impulsar o uso destas vías.
Buscouse tamén, en palabras de Abertis e Áreas, “adaptar a
actividade destes espazos aos novos hábitos dos condutores
usuarios”. Os traballos abrangueron tamén labores de redeseño e
modernización.
O proceso iniciouse en
2011 e en verdade culminará nuns meses. Supuxo un investimento de
12,78 millóns de euros por parte de Áreas. Ao longo de 2011
renováronse as áreas da autoestrada AP-68 Zaragoza-Bilbao. En
Cataluña habilitáronse novos espazos en Empordá e Montseny, os
dous pertencentes á AP-7, en Lleida (na AP-2) e en Aragón, máis en
concreto en Monegros e atinxindo á AP-2. As dúas compañías
sinalan que nuns meses estarán rematadas as reformas dos espazos de
lecer e La Jonquera, La Selva e Montcada, todas elas da AP-7. Estes
traballos significarán o remate do plan de reforma.
Estes novos emprazamentos de
servizo permitirán acceder a Internet desde o computador portátil
ou o dispositivo móbil sen gastar datos da nosa tarifa.