Apple vende o seu iPhone mil millóns
xoves, 28 de xullo do 2016
Os últimos
resultados económicos trimestrais de Apple, pese a ser moi bos, marcan unha
tendencia preocupante para a evolución da compañía, xa que tería rexistrado
unha redución interanual de vendas en todas as súas liñas de produto, o que no conseguiu
compensar o seu crecemento na división de servizos (con cada vez máis peso),
dando a impresión de que a compañía da mazá tocou teito, o que resultaba evidente
que tería que chegar cedo, xa que o mercado no pode estar medrando de xeito
ilimitado e a capacidade de absorción de dispositivos de alta gama non pode
medrar eternamente, resultando bastante curioso que este punto de inflexión se
rexistre agora, a poucos días do momento no que se estima que Apple
vendeu o seu iPhone número 1.000 millóns (volume impresionante
especialmente se temos en conta que a barreira dos 500 millóns superouse hai un
par de anos, de aí que a caída de
Apple haxa que mirala con certa perspectiva).
Tim Cook, director xeral de Apple, declarou ante os seus empregados que “o
iPhone converteuse nun dos produtos de máis éxito, importancia e impacto da
historia. Converteuse en máis que un compañeiro constante, o iPhone e realmente
unha parte esencial da nosa vida diaria e permite moito do que facemos ao longo
do día”.
Volvendo aos resultados trimestrais da compañía de Cupertino temos que
globalmente caeu en ingresos un 15%, sendo especialmente preocupante o caso
chinés (onde caeu un 33% pese a ser un mercado no que Apple entrou hai pouco, e
que pasou de ser o segundo mercado despois do norteamericano para quedar detrás
de Europa), e analizando os resultados por dispositivo temos que se mantén a
caída de vendas do iPad (9%) que agora vén acompañada pola caída de ordenadores
persoais (11%) e de teléfonos (15%), aínda que no caso dos ordenadores persoais
podemos matizar a saúde de Apple na venda de equipos informáticos é moi
superior á dos seus competidores, xa que é o mercado xeral o que está a
contraerse.
Un detalle a salientar é que neste último trimestre a división de servizos de
Apple facturou 5.976 millóns de dólares, superando á división de Mac (5.239
millóns), deixando clara a boa decisión de Apple ao apostar a longo prazo por ir
máis aló da venda de produtos.