Apple amosa as probas de resistencia ás que somete aos seus móbiles
venres, 26 de setembro do 2014
Ao igual que tras o antennagate
Apple tivo que amosar ante o público os laboratorios nos que fan probas cos
seus teléfonos, agora co bendgate a
compañía de Cupertino abriu as
portas das instalacións nas que fan as probas de resistencia dos seus terminais
ás cámaras da CNBC, para que quedase claro que os novos iPhone 6 Plus
superan as probas precisas para acadar os estándares de calidade máis rigorosos.
Chegan a asegurar que o iPhone 6 é “o produto máis probado que fixemos nunca”
con máis de 15.000 unidades de proba dos novos teléfonos antes do seu
lanzamento (aínda que a meirande parte das probas fixéronse en China).
Apple convidou a distintos medios para que puidesen ver in situ como son as
probas ás que someten aos terminais, para comprobar que soportan as
situación propias do noso día a día. Temos así que Apple fai probas para
comprobar se os terminais poden estragarse cando o usuario senta sobre o
teléfono e unha superficie dura, tamén se someten os teléfonos a 25 quilogramos
de forza sobre tres puntos para comprobar se chega a dobrar (superando
satisfactoriamente esa proba, pese aos rumores sobre tal vulnerabilidade),
aplícaselle unha forza de 10 quilos sobre o centro do teléfono para ver a súa
resistencia á presión e incluso intenta retorcerse o dispositivo en varios
ángulos distintos.
Parece quedar así demostrada a boa fabricación dos novos iPhone 6,
comprobándose que a polémica do bendgate
era bastante artificial e non debería preocupar á meirande parte dos futuros
compradores dun iPhone 6 Plus, que deberían ter a mesma prudencia co novo tabletófono de Apple que con outros
dispositivos de semellantes dimensións.
Reportaxe da CNBC sobre as probas de resistencia dos novos iPhone 6 e iPhone 6 Plus