Android vai camiño de acaparar a práctica totalidade do mercado estatal

mércores, 8 de agosto do 2012 Fernando Sarasketa

O Samsung Galaxy Mini é o <em>smartphone</em> máis vendido en EspañaO sistema operativo de Google para móbiles, Android, abrangue arestora o 87,1% da cota de mercado estatal, segundo se sinala nos máis recentes informes de Kantar World e reflicten os medios na Rede. Para entendermos mellor o que representa esta cifra, cómpre ter en conta que o ano pasado, en España, a devandita cota era do 47,9%. De continuar medrando así, a este ritmo, calcúlase que en breve estará presente na gran maioría dos trebellos, beneficiándose de tres acontecementos decisivos e fundamentais: o retroceso de Symbian, a caída de vendas de Apple e a suba dos trebellos da marca Samsung, que son hoxe en día os principais valedores de Android.
De feito, Samsung acapara case a metade das vendas a nivel europeo, chegando ao 60% en países como España.
Na outra cara da moeda temos ao xigante Apple, que perdeu até un 11% do mercado en determinadas áreas xeográficas, e a Symbian, que en España pasou de ter un 30% do mercado a contar con unicamente un 2,7%.

PUBLICIDADE