Amosan na Coruña os proxectos finais de Talentum Startups Galicia
venres, 31 de outubro do 2014
Esta mañá
a sede coruñesa da Fundación Barrié acolleu un acto de peche da presente edición
do programa Talentum
Startups (na súa vertente galega), na que os seus proxectos máis representativos
puideron verse en presentacións de 4 minutos nas que amosaron o seu concepto
innovador e con vocación emprendedora, para ser avaliados por varios expertos
que puideron ver posteriormente o estado actual de desenvolvemento destas
iniciativas e someter aos seus responsables a preguntas para coñecer de preto
os seus produtos e o seu potencial comercial.
As iniciativas emprendedoras que nos últimos meses gozaron do programa Talentum
que puideron verse na Coruña foron:
- Thunder Breaker. Un aditivo xogo
arcade para móbil no que crearemos e pilotaremos a nosa propia nave. Teremos
milleiros de opcións de personalización “que farán cada partida única”. Foi
presentado por Raúl Martínez e Abrahan Dopazo.
- Trendon.me.
A plataforma en liña para o mundo da moda na que tendas, deseñadores,
promotores e afeccionados atoparán un espazo común onde descubrir, compartir e
comprar moda. Cunha rede social creada por e para a moda, os usuarios poderán
coñecer tendencias, compartir e comentar. Pero tamén adquirir artigos, non só
de grandes marcas, senón tamén de pequenas boutiques e deseñadores
noveis. Defendeu o proxecto Nuria Iglesias.
- Keyless
home. Unha solución que simplifica a apertura das portas dun edificio ou
vivenda substituíndo as chaves polo móbil con tecnoloxía NFC. Aforra custos á
comunidade ao mesmo tempo que se incrementa a seguridade controlando de forma
inmediata quen pode acceder ao edificio e as súas instalacións. Amosaron un
prototipo do produto Carlos Rosales e Ricardo de Juan.
- War of Sides. Un xogo de
realidade aumentada para móbiles no que loitaremos contra dragóns e outras
criaturas. Os nosos adversarios, amigos ou non, estarán á espreita para
roubarnos os nosos territorios. “Fantasía e realidade mesturaranse botando man
das últimas tecnoloxías nos móbiles: xeolocalización, xiroscopio, cámara e o
acceso a datos na nube” que foi presentado por Saúl Molinero.