Amosan como enganar ao lector de pegadas dixitais do Samsung GALAXY S5

Como xa acontecera co lector de pegadas dixitais do iPhone 5S, un vídeo de SRLabs demostra como o escáner de pegadas do Samsung GALAXY S5 adoece das mesmas carencias, e pode enganarse cunha pegada dixital falsa para poder acceder ao smartphone sen autorización e, o que resulta máis grave, poder aprobar operacións a través de PayPal, destacando unha vez máis a baixa seguridade deste tipo de medidas de identificación biométrica.
Cómpre destacar que o sistema de Apple, Touch ID, require a introdución do contrasinal do dispositivo cando menos unha vez por cada reinicio do terminal, pero no dispositivo de Samsung é posible empregar só o desbloqueo mediante a pegada, o que fai bastante máis vulnerable o dispositivo.
Dende PayPal aseguran que toman moi en serio a descuberta de Security Research Labs, pero consideran que a identificación mediante a pegada dixital é máis segura e doada de empregar que un contrasinal para a realización de pagamentos dende o móbil e, dado que PayPal non rexistra a pegada do usuario (que permanece sempre no seu dispositivo) estiman como medida suficiente que o usuario poida revogar a autorización do smartphone para empregar PayPal no caso de que o seu móbil se perdese ou fose roubado.

Vídeo no que amosan como é posible enganar ao sensor de pegadas dixitais do Samsung GALAXY S5