Agestic proponlle a Innovación un catálogo de melloras para o acceso TIC dos autónomos
xoves, 30 de outubro do 2008
No marco da reunión que tivo lugar ao longo da mañá de onte entre representantes das principais Organizacións Empresariais e de Autónomos de Galicia e a directora xeral de Sociedade da Información, Helena Veiguela, Agestic presentou un amplo documento no que explica os motivos polos cales a implantación das TIC e de Internet, ao seu entender, “se están a retrasar entre o colectivo de autónomos e micropemes de Galicia, debido fundamentalmente ao descoñecemento de que son e para que serven”. Neste escrito, Agestic fai constatar que un 44,61 por cento dos membros do devandito colectivo “tan só ten un coñecemento mínimo das TIC” e que un 12,96 por cento “conta cun coñecemento nulo”. Asemade, engadiu que“un 60 por cento dos mesmos atópanse afastados das tecnoloxías, e descoñecen para que serven e o que poderían mellorar as condicións das súas empresas”. É por isto que Agestic, vénlle de propor á Consellaría de Innovación e Industria unha serie de medidas de información, formación, axudas, subvencións, realización de aplicacións a medida para certos colectivos (como os sector agrario, forestal, turismo rural, pequenos artesáns, carpinteiros, mecánicos...) e outras solucións de mobilidade e acceso ás TIC que lles faciliten a estes empresarios e autónomos galegos a súa plena integración na Sociedade da Información xa que, aseguran, “neles recae boa parte da riqueza empresarial de Galicia”. Os responsables desta iniciativa aseguraron, asemade, que se os devanditos colectivos e profesionais accedesen a implantar solucións informáticas, “serían máis competitivos e o seu efecto tractor faría que o mercado do software e do hardware se activase”. No mesmo documento, Agestic recoñece o “importante esforzo” que están a levar a cabo tanto a Xunta de Galicia como as Organizacións Empresariais, Sectoriais e Territoriais para estender a Sociedade da Información e superar a denominada fenda dixital, aínda que asegura que “a na aplicación das TIC polo tecido empresarial hai puntos febles de abondo”. Asemade, os autores do escrito aseguran que “se está a avanzar na implantación das infraestruturas de acceso pero que no medio rural aínda queda moito por facer” e conclúen afirmando que “é preciso apostar pola Sociedade da Información e o coñecemento, porque esta chegue a todos os colectivos de potenciais usuarios”. Dende Agestic recomendan “un esforzo especial” dende a Consellaría de Innovación cos autónomos e pequenos e medianos empresarios para que este colectivo mellore as súas condicións de competición no mercado.