A tecnoloxía galega, un exemplo a seguir en Madrid

As persoas responsables da área de innovación e desenvolvemento da Tecnópole (Parque Tecnolóxico de Galicia) e do Polígono Industrial de Sabón (Arteixo, A Coruña), que recentemente uniron forzas para mellorar a I+D+i das súas empresas asociadas, vanse achegar hoxe mesmo a Madrid para colaborar no Programa de Cooperación entre Parques Industriais e Tecnolóxicos (COPIT) que se celebra na capital, para contar de primeira man a súa experiencia neste proxecto, escollido como “caso de éxito” entre todos os levados a cabo en España.
Como resultado da primeira fase deste programa, iniciada a finais de 2009, pecháronse dous acordos en firme para levar a cabo proxectos de I+D+I conxuntos entre dúas empresas de Sabón e o Centro Tecnolóxico AIMEN, (que ten a súa sede comercial na Tecnópole) e, segundo informan, “estanse a concretar outras dúas colaboracións que aínda están en fase de negociación”.
É por isto que o programa terá continuidade tamén este ano, no que se agarda que os contactos para intercambio de oferta e demanda de tecnoloxía se materialicen en máis futuras colaboracións entre empresas galegas.
A experiencia da que falarán hoxe en Madrid, na que tamén participou o Polígono Industrial de San Cibrao das Viñas (Ourense), será presentada no marco da xornada informativa sobre o Programa COPIT, e a ela asistirán representantes de todos os parques e polígonos españois participantes, que aproveitarán para coordinarse de cara á segunda fase do programa.
Os proxectos de I+D+i que se están a poñer en marcha como froito dos intercambios propiciados por COPIT en Galicia desenvólvense nos ámbitos da enxeñería de materiais e do medio ambiente, e son o resultado de tres sesións de traballo levadas a cabo por videoconferencia.
Isto permitiu que a distancia xeográfica non fose unha barreira para establecer un primeiro contacto entre empresas galegas con intereses comúns, un dos principais obxectivos do programa, e tamén posibilitou a mellora da súa competitividade grazas á cooperación de base tecnolóxica.

En toda España

Esta iniciativa estase a levar a cabo en toda España a través de 20 parques científicos e tecnolóxicos e 28 polígonos industriais, que buscan mellorar a competitividade das empresas e centros tecnolóxicos situados nestes recintos a través de fórmulas de cooperación entre eles.
O Programa está financiado polo Ministerio de Industria, Turismo e Comercio mediante fondos FEDER e nel colaboran a Asociación Española de Parques Científicos y Tecnológicos de España (APTE), a Coordinadora Española de Polígonos Industriales (CEPE), a Escuela de Organización Industrial (EOI) e a Empresa Nacional de Innovación (ENISA).