A revista satífica Botafumeiro rexorde durante a celebración de Viñetas desde o Atlántico
xoves, 13 de agosto do 2015
Hai pouco máis dun ano nacía a revista
satírica dixital O Botafumeiro,
que seguindo os pasos de Orgullo y
Satisfacción opta pola exploración dos soportes dixitais para chegar ao
público, antes as dificultades que na actualidade ten a edición en papel, pero
comprobando en primeira persoa as dificultades para prosperar no mercado
dixital, tanto pola falta de hábito dos lectores a ler en pantallas (de
ordenador, eReaders ou tabletas) como pola dificultade de darse a coñecer. A
estes atrancos tamén habería que sumar o estarmos ante un medio en galego, o
que xa de por si supón o dirixirse a un público moi reducido.
Pese a todo o mencionado, a publicación conseguiu distribuír tres números
publicados nun curto período de tempo, o que provocou certo desgaste, que levou
a que mudasen o seu rumbo para centrarse a producir contidos que se
distribuíron durante meses a través de distintas plataformas sociais con
bastante éxito, pero a celebración do festival Viñetas desde o Atlántico
levounos a reformular a súa proposta, e pensar en devolver o proxecto ás súas
orixes, pero dun xeito máis realista. Botou a andar así esta semana o segundo volume do Botafumeiro, revista dixital que pode descargarse a través da súa
páxina web por un prezo que decide o propio lector, e esta mañá os seus coordinadores
quixeron explicar a súa iniciativa dentro das actividades de Viñetas.
Segundo mencionan Alexandre
Viñuela Jano e Cristo Aleister, a nova etapa da
revista Botafumeiro relaxa a súa
periodicidade, para publicarse cada 3-4 meses, e incluso prevendo a
organización de campañas de micromecenado para financiar a comercialización de
volumes impresos nos que recompilarán parte do material publicado en liña.
Deste xeito é posible que O Botafumeiro
pase a ser unha publicación con certa actividade na Rede que cada ano podamos
ver en soporte físico co gallo de eventos como a feira da banda deseñada da
Coruña, conseguindo así adaptarse ás novas tendencias deste mercado tan
dinámico no que pode considerarse como un xeito de encher un baleiro moi
importante que había no noso mercado editorial, que quedar orfo de publicacións
nas que recoller as obras dos autores locais.
Precisamente un dos grandes méritos desta publicación electrónica é que xunta a
numerosos autores galegos como Dani Xove, Jano, Cristo Aleister, Martín Romero,
Los Bravú, Luís Sendón, Manel Cráneo, Fernando Ruibal, Xoán Andrade, Álvaro
Valiño e moitos outros (entre os que destacan varias figuras femininas como Paula Carro e Verónica Godoy, algo pouco frecuente no mundo do humor gráfico e da sátira), que teñen así unha plataforma para amosarse ao mundo,
sendo todo un esforzo a coordinación dos seus traballos para crear un produto
con identidade de seu, que estes días podemos ver como se está a promocionar na
Coruña, nunha caseta na Rúa da BD de Viñetas desde o Atlántico (nos Xardíns de
Méntez Núñez) onde os responsables da revista buscaron un xeito de casar o mundo
real co dixital, entregando aos visitantes que queren facerse cunha copia da
súa publicación un papeliño no que figura un código de descarga para facerse co
número 1 do segundo volume da revista Botafumeiro.
Un proxecto que promete dar guerra durante moito tempo, para o que procurará
facer ruído para que a xente non esqueza a importante de contar cunha revista
satírica que fale do noso contorno e na nosa lingua.
- En Viñetas desde o Atlántico os responsables da revista Botafumeiro reparten códigos de descarga para facerse co seu último número