A biblioteca dixital de Galicia integra o histórico fondo documental de Díaz Baliño
xoves, 5 de xaneiro do 2017
Galiciana, a
biblioteca dixital de Galicia (biblioteca.galiciana.gal),
vén
de pór a disposición de toda a cidadanía, a través da Rede, o
fondo documental do histórico galeguista e intelectual Camilo Díaz
Baliño, pai de Isaac Díaz Pardo, quen por certo foi
responsábel previamente de xuntar e dar forma a este legado.
Trátase, en conxunto, de 200 fotografías, relatos orixinais, unha
pequena biblioteca persoal e 10 álbums elaborados por Camilo
Díaz que recollen toda a súa actividade profesional en América
como escenógrafo. Ademais, hai un centenar de cartas e documentos
persoais. A integración en Galiciana destes arquivos coincide coa
entrada en dominio público da obra de Díaz Baliño e máis co
quinto cabodano do pasamento de Díaz Pardo.
Segundo sinalan os
responsábeis da biblioteca dixital, “trátase dun fondo
documental de grande importancia para o estudo e a investigación da
historia e da cultura galegas do século XX, nomeadamente da
Galicia exterior e da intelectualidade galega exiliada, a través de
múltiples expresións de senlleiros creadores, da literatura, das
artes, da prensa etc”. Boa parte deste material foi dixitalizado
pola Biblioteca de Galicia, en colaboración coa Fundación
Telefónica, e o resultado do traballo foi a catalogación de 50
unidades documentais e a conversión a formato dixital de máis de
1.700 páxinas.