A banda larga galega sométese a exame por parte da AETG
mércores, 22 de abril do 2015
A
directora da Axencia
para a Modernización Tecnolóxica de Galicia (AMTEGA),
Mar Pereira, e o presidente da Asociación
de Enxeñeiros de Telecomunicación de Galicia (AETG),
Ramón Bermúdez de Castro, veñen de asinar un acordo
de colaboración no que se vai á procura dunha posta a punto das
telecomunicacións en Galicia.
Para isto quérese promover un ambiente a prol do investimento dos
operadores para que os cidadáns poidan acceder a máis e mellores
servizos de telecomunicación asumíbeis.
Emporiso, esta
acción responde “aos numerosos cambios en materia das
telecomunicacións que se están a producir nestes anos”,
sinalaron, e que repercuten nas actividades sobre as que exercen as
súas competencias as entidades locais. Trátase pois de “eliminar
as dificultades de actualización normativa e de acceso á
información tecnolóxica que condicionan o funcionamento cotián
destas administracións locais”.
Deste xeito, a
AETG levará a cabo medicións e controis sobre o terreo da calidade
do servizo das redes de acceso á banda larga a través de
tecnoloxías sen fíos existentes en Galicia. Engadir que A AMTEGA
achegará á Asociación de Enxeñeiros de Telecomunicación de
Galicia 65.000 euros para o desenvolvemento das actuacións que se
recollen no acordo.
Asemade, grazas
a este acordo, a AETG pon á disposición dos concellos galegos un
servizo de asesoramento sobre normativa e solucións técnicas para o
despregamento de infraestruturas de telecomunicación. O dito servizo
está dispoñíbel a través do teléfono 981 91 35 76 en horario de
luns a venres de 9:00 a 14:00h e no enderezo de correo electrónico
(oficinaconcellos@aetg.gal).