A Wii U chegará ás tendas a tempo para o Nadal

Pese ao bo funcionamento comercial da Nintendo 3DS na tempada de Nadal, Nintendo vén de anunciar o seu primeiro ano de perdas, estimando unhas perdas operativas de 45.000 millóns de iens, moi superiores ás agardadas, pois tiveron que reducir as previsións de vendas das súas consolas.
Esta caída dos resultados da compañía respondería a moitos factores, como o mal comezo da 3DS (consola portátil que agora goza dunha excelente saúde), o estancamento da Wii (que está moi preto de tocar teito), o investimento en investigación e desenvolvemento (aparte da nova 3DS están a preparar a Wii U) e, moi especialmente, a fortaleza do ien (o que prexudica seriamente ás exportacións).
Pero tras das estas malas novas, o presidente de Nintendo, Satoru Iwata, aproveitou a ocasión para confirmar que a súa compañía pretende achegar a súa nova consola doméstica, a Wii U, aos mercados norteamericano, europeo e xaponés a finais de ano, a tempo para o Nadal.
Nos vindeiros meses coñeceremos máis detalles da nova consola, que segundo distintos rumores, incluso podería mudar de nome, posto que dende Nintendo percibiron problemas á comercialización da 3DS polo seu nome (demasiado semellante ao da anterior portátil da compañía) polo que é posible que realicen certos cambios de cara a unha mellor comercialización (lembremos que a Wii tamén respondía a outro nome nos seus comezos: Nintendo Revolution).