A Universidade de Vigo lanzará un novo satélite ao espazo, co que controlar o cambio climático
martes, 5 de xuño do 2012
- A presentación do proxecto tivo lugar na sala 1 do Edificio Miralles
Dende que no pasado mes de febreiro se puxo en órbita
o satélite XaTcobeo, na Universidade de Vigo, lonxe de sentarse e agardar a que
viñeran os éxitos, puxéronse a traballar nun novo proxecto de similares
características e maior envergadura; falamos do proxecto HUMSAT, que conta co
apoio da ONU e da Axencia Espacial Europea para, entre outras cousas, enviar ao
espazo o satélite demostrador HUMSAT/DEMO.
Este satélite, de 850 gramos de peso, percorrerá unha
órbita circular a unha altura constante duns 700 quilómetros, e
segundo nos informa o DUVI, “será a primeira peza da constelación de
satélites, sensores e estacións de terra que conforman o proxecto HUMSAT”.
Esta rede mundial de sensores, por certo, de menos de
10 dólares, permitirán monitorizar parámetros para estudar o cambio climático
en zonas sen infraestruturas de telecomunicación ou eléctricas, así como a
transmisión de información urxente en situacións de emerxencia.
O profesor da Universidade de Vigo e investigador
principal do proxecto, Fernando Aguado, móstrase moi satisfeito co proxecto, do
que asegura, “nos permite pasar dun proxecto educativo como XaTcobeo a outro que con
cobertura mundial permitirá controlar o cambio climático e as situacións de
emerxencia”.
A constelación artificial HUMSAT, estará composta por un total de 9 satélites,
8 dos cales desenvolverán as universidades de Cal Poly, UNAM, Baja California,
Torino, Sapienza, Nardvik e Alcalá de Henares; e un noveno do que se encargará
a entidade académica viguesa para completar a constelación antes do 2014.
Previsiblemente, o lanzamento do HUMSAT/DEMO terá lugar o vindeiro 20 de
novembro en Baikonur (Kazajstán) e realizarase a bordo do foguete Dnepr. O
satélite da Universidade de Vigo irá, a súa vez, aloxado no interior dun
satélite da Universidade de Roma que será o encargado da súa posta en órbita.