A UDC celebra o Día d@ Científic@ Galeg@ e esixe que se amose o labor investigador das mulleres
mércores, 23 de abril do 2014
Hoxe desenvólvese o Día
do Científico Galego da man da Real Academia Galega da Ciencia. Para
conmemoralo e para ir máis alá desta festividade (achegando
renovación e alternativas), a
Oficina de Igualdade de Xénero da Universidade da Coruña lanza a
campaña Día d@ Científic@ Galeg@. Segundo
explica este departamento da UDC, o feito de escribilo con arrobas
non é casual ni fortuíto. Trátase, de feito, dun convite á
reflexión “sobre a necesidade de incluír as
mulleres cando se fala de ciencia e tecnoloxía”.
A campaña
preséntase como dixemos con motivo do Día do Científico Galego.
Para a UDC, é un feito que tanto esta celebración como as propias
entidades que velan pola investigación na nosa terra (incluída a
Real Academia) manteñen de sempre ás mulleres que traballan por e
para o coñecemento e a tecnoloxía nun réxime de anonimato. “Con
este motivo”, engade a Oficina, “as unidades de igualdade das
tres universidades galegas enviaron o ano pasado ao presidente da
RAGC unha carta que non tivo resposta, aínda que celebran o
nomeamento este ano da primeira muller académica que, pensan, en
algunha medida podería ser consecuencia daquela carta”.
A campaña deste ano da
Oficina consta dun cartel encabezado como Día d@ científic@
galeg@, composto por unha escolma das fotos que se presentaron ao
I Concurso fotográfico Rosalind Franklin As mulleres na ciencia e
na tecnoloxía, promovido pola OIX para amosar o papel das
mulleres neses ámbitos. “Con este cartel”, engaden os
responsábeis deste departamento, “queremos suxerirlle á Real
Academia que modifique o nome da efeméride, de xeito que se recoñeza
ás numerosas científicas galegas, que sen dúbida tamén serán
premiadas algún día e ás que compre visualizar para fomentar
deste xeito modelos de mulleres lonxe dos estereotipos creados”.
A Oficina lembra que a
porcentaxe de mulleres científicas no sistema universitario galego
acada case o 50%. E engade: “É fundamental falar de científicas e
científicos en calquera comunicación que se refira ao colectivo das
persoas que fan ciencia”.