A Deputación de Pontevedra pon SmartPEME ao servizo do tecido produtivo de Vigo
xoves, 22 de setembro do 2016
Este xoves a
Deputación de Pontevedra presentou en Vigo o seu programa SmartPEME,
unha iniciativa que substitúe a antiga Rede CPAE 2.0, que ten
diferentes centros de operación (Vigo, Porriño, Cambados,
Pontevedra, Lalín e Ponteareas) e que se caracteriza por ofrecer a
empresas, autónomos e profesionais múltiples actividades formativas
e divulgativas en materia de ferramentas dixitais. A presentación
celebrouse pola mañá no Centro
de Asesoramento SmartPEME de Vigo. Na cita, a presidenta da
Deputación, Carmela Silva, lembrou que SmartPEME
está ao servizo do tecido empresarial da cidade e da súa contorna e
que se trata “dunha rede de asesoramento, formación e información
para a posta en marcha de proxectos, pero tamén para a mellora
daqueles que xa existen pero que poden ser mellorados a través das
novas tecnoloxías da información".
Silva explicou tamén que a Deputación de
Pontevedra ten en marcha SmartPEME
coma un programa “que quere estar ao carón da innovación, dos
emprendedores e emprendedoras, dos autónomos e autónomas e das
medianas e pequenas empresas da cidade de Vigo e de toda a súa
área". Igualmente, recordou que “máis do 90% das empresas da
área de Vigo son PEME”, e que, polo tanto, “resultaralles de
moita utilidade un instrumento coma SmartPEME, que lles permitirá
obter maiores beneficios, maior presenza nacional e internacional,
mellores resultados, e, en consecuencia, maior eficacia cun claro
obxectivo, crear empresas e traballo na zona”.
2.000 firmas asesoradas
Na presentación tamén se fixo saber, a un nivel
máis xenérico, que a través de SmartPEME a Deputación asesora
hoxe en día a máis de 2.000 empresas na provincia. Ademais, sinalou
Silva, trátase dunha cifra en aumento, xa que “cada día son máis
os emprendedores e emprendedoras que se suman ao proxecto e, tamén,
cada vez máis concellos colaboran para que o programa sexa unha
ferramenta útil para apoiar ao tecido empresarial de cada contorna”.
Silva tamén tivo palabras de agradecemento ao
alcalde Abel Caballero, que tamén participou no acto e que, segundo
a presidenta, está a brindar o apoio para que SmartPEME “cree na
cidade unha grande rede de traballo conxunto entre Administracións e
tecido empresarial”. O alcalde, pola súa banda, salientou que o
programa é “unha demostración máis de que estamos ante unha nova
Deputación, unha nova forma de entender a relación entre
institucións para tratar cuestións tan importantes como o apoio ás
empresas”. E engadiu: “Por primeira vez na historia, imos xuntos
Deputación e Concello en algo como establecer novas pancas de
competitividade e tecnoloxías nas pequenas e medianas empresas".
Charlas e coloquios
Na presentación, amais de presentarse as
características de SmartPEME,
completouse a xornada cunha serie de charlas e coloquios para
favorecer o networking entre o tecido empresarial da zona. O
experto Pablo Galiana impartiu unha charla coloquio sobre
transformación dixital das PEME, e, con posterioridade, as persoas
asistentes puideron participar na presentación de dúas empresas,
unha de Pontevedra e outra de Vigo, “moi internacionalizadas” e
que foron capaces de pór en marcha proxectos hoxe xa consolidados.
Seis sedes de seu
O proxecto SmartPEME
é un novo servizo de apoio e asesoramento orientado á mellora
competitiva de empresas e profesionais e á mellora nas vendas e á
eficacia das tarefas, a través das tecnoloxías da información.
Para acadalo, a rede conta con seis centros de asesoramento (Vigo,
Porriño, Cambados, Pontevedra, Lalín e Ponteareas), dende onde se
ofertan actividades e servizos e onde o tecido empresarial pode
atopar todo tipo de información e apoio. A rede traballa agora man a
man cos concellos, na procura de que o proxecto se oferte coma un
servizo propio dos municipios.