A Coruña informa que o 80% do seu proxecto Smart City estará operativo a comezos de 2015
mércores, 23 de xullo do 2014
O Concello
da Coruña presentou este martes 22 novos datos sobre o seu proxecto
Coruña Smart City, unha iniciativa que segundo fixo saber o
tenente de alcalde Martín Fernández Prado, terá en funcionamento o
80% do seu potencial durante o primeiro trimestre de 2015. A achega
destes datos coincidiu coa aprobación da adxudicación de 10 dos 14
proxectos piloto (os catro que fican pendentes licitaranse ou
adxudicaranse nas vindeiras semanas, fíxose saber). En total,
informou Fernández Prado, presentáronse un total de 43 ofertas de
empresas locais e nacionais, resultando 10 empresas distintas.
“Isto”, dixo, “pon de manifesto que Coruña Smart City é un
proxecto aberto”.
O responsábel de Medio
Ambiente, Territorio e Infraestruturas informou tamén que o
investimento para as devanditas licitacións ascende a máis de 3
millóns de euros. Os proxectos aprobados na mañá deste martes son
os seguintes: un Sistema de información de eventos multicanle (un
portal dirixido a permitir que a veciñanza coñeza vía online a
oferta de lecer, cultura e deportes da cidade e contorna,
constituíndose tamén como unha plataforma para a interacción entre
cidadáns e asociacións culturais), un Sistema de visitas guiadas
con realidade aumentada, un Sistema de control de calidade do ar e
control de ruído, un Sistema de telecontrol de rega intelixente de
parques e xardíns, unha Plataforma de eAdministración (servirá
para dar forma á sede electrónica e “facilitará xestións en
liña de ducias de procedementos”, informou o Concello), un Sistema
de telexestión de contadores de auga e gas, un Sistema de
telexestión de redes de abastecemento e saneamento (que permitirá
seguir polo miúdo toda a infraestrutura, grazas ao XIS e ao propio
sistema de telexestión), un Sistema de control, seguimento e alerta
da calidade da auga, un Sistema de aparcamento intelixente (permitirá
ver o sistema de rotación de prazas a través dos dispositivos) e un
sistema de control e seguimento de eficiencia enerxética en
edificios públicos.
Como lembraremos, o
proxecto de Coruña Smart City naceu co fin “de deseñar un novo
modelo de cidade, empregando as novas tecnoloxías para responder
desde a administración á demanda crecente de eficiencia,
desenvolvemento sustentábel, calidade de vida e xestión das súas
recursos”. O proxecto, iniciativa do Concello da Coruña e EMALCSA
como solicitante, conta cun co-financiamento dos Fondos FEDER (80%) e
un orzamento total de 11,5 millóns de euros. A inciativa artellouse
en dúas fases. A primeira, adxudicada en abril do ano pasado á
alianza empresarial formada por Altia, Ilux, Indra e R, consistiu no
deseño e posta en marcha da plataforma tecnolóxica, á que se
coñece como “o cerebro da cidade”. Esta plataforma está
arestora en fase de probas, “incorporando os servizos municipais e
a información interna para polos a disposición das empresas e xerar
novos servizos aos cidadáns”, informou o Concello.