A Coalición ProInternet di que o canon AEDE tería un custe de 1.133 millóns ao ano para os internautas
martes, 22 de xullo do 2014
A Coalición ProInternet
vén de amosar unha serie de críticas á implantación do canon
AEDE, unha iniciativa da Asociación de Editores de Diarios Españoles
para recadar compensacións dos agregadores de contido (tipo Google
News ou Bing News) que ligan contidos publicados polos sitios web dos
medios de AEDE. Esta taxa, sinala a plataforma, tería unha impacto
negativo de 1.133 millóns de euros ao ano para os internautas
españois. Isto no que se refire á comunidade en liña: as
consecuencias a nivel xenérico sería igualmente salientábeis,
sinalan, e difíciles de cuantificar.
A xuízo da coalición,
as empresas veranse negativamente afectadas, tanto que se promoverá
a deslocalización de moitas delas, amais de promoverse “unha
importante perda de empregos en sectores de alto valor engadido”.
Estas e outras
conclusións figuran
nun informe feito por Analistas Financeiros Internacionais (AFI) para
a Coalición ProInternet. A presentación destes datos coincide
coa tramitación parlamentaria do texto refundido da lei de
Propiedade Intelectual (LPI). Este proceso, sinala a plataforma,
prevé o “dereito irrenunciábel” dos editores de prensa a
percibir unha taxas de man dos fornecedores de servizos en liña de
agregación.
A plataforma, amais de
dar a coñecer as devanditas información, tamén lanzou un
chamamento a todos o grupo políticos para “promover unha
paralización desta tramitación urxente de Lei que se pretende levar
adiante sen ter en conta este tipo de impactos económicos e sobre o
emprego, en contra da opinión dunha gran maioría de editores,
empresas do sector de Internet e preto de 80.000 cidadáns que
expresaron publicamente a súa oposición á actual redacción do
artigo 32.2”. Asemade, a Coalición leva a cabo unha campaña nas
redes sociais (Twitter e Facebook) para divulgar o informe “e todo
o referido a esta medida que se podería aprobar esta mesma semana a
porta pechada nunha comisión do Parlamento”. Tamén se pode asinar
a petición
iniciada en Change.org.