A Aula de e-learning do CESGA cumpre unha década de éxitos
mércores, 13 de xuño do 2012
Alá polo mes
de xuño do 2002, o Centro de Supercomputación de Galicia (CESGA) habilitou unha
plataforma de e-learning na Rede, para que docentes e investigadores de tódolos
ámbitos puideran levar a cabo experimentos en materia das TIC aplicadas ao
ensino.
Agora, dez
anos despois, o persoal responsable desta Aula CESGA (que así se fixo chamar
dende entón) vén de facer reconto dos proxectos e experimentos que se
realizaron neste tempo para dar conta das posibilidades ofrecidas polas contornas
virtuais para o aprendizaxe, e os datos recadados non son nada pesimistas.
Así, dende
CESGA afirman que este servizo estable, ofrecido pola área de e-learning da
entidade, conta con case 23.000 usuarios e 800 cursos, aos que se pode acceder
dende calquera punto da xeografía.
Con motivo
do décimo aniversario da posta en marcha desta plataforma virtual, o pasado
venres, día 8 de xuño, celebrouse nas instalacións do CESGA un encontro ao que
asistiron usuarios de diferentes ámbitos, para coñecer de primeira man as
novidades que ofrecerá a vindeira versión da Aula CESGA para o curso 2012-1013,
así como para participar en talleres e visitar as instalacións que acollen o
supercomputador Finisterrae.
Esta aula,
segundo informan os seus responsables, vén de converterse nun “referente en
Galicia” no mundo das plataformas de aprendizaxe e colaboración en liña
baseadas en código aberto, posto que, “é a única que ofrece un espazo a
investigadores e profesores galegos de calquera ámbito educativo para a
experimentación coas TIC, e o traballo colaborativo cos seus alumnos e
compañeiros”, puntualizan.
A utilidade
desta plataforma virtual de e-learning radica, asemade, na posibilidade de
darlle servizo a niveis educativos do máis variado, tales como a contorna
universitaria, secundaria, as Escolas Oficiais de Idiomas ou os ciclos
formativos, entre outras.
Próxima versión
A próxima versión de Aula CESGA, que se porá en servizo a comezos do vindeiro curso (agosto-setembro), contará con novas funcionalidades, algunhas moi destacadas, tales como un servizo de multiconferencia baseado en BigBlueButton (webminar de código aberto), e unha mellora cualitativa
nas funcionalidades existentes
como a rede social, o traballo en grupos, a xestión dos contidos formativos e usuarios, etc.
Ademais,
segundo informan dende a entidade, o nivel de satisfacción coa plataforma e co servizo de soporte que ofrece o CESGA “seguiu sendo moi elevado”, ao longo dos últimos anos. Os usuarios e usuarias valoran da
plataforma a capacidade de ofrecer unha resposta próxima e eficaz aos seus problemas ou dúbidas coa ferramenta. A próxima versión de Aula CESGA “responderá á necesidade de actualización e novas funcionalidades
reclamadas polos usuarios”,
engadiron.