A Aula TIC PEME organiza un obradoiro virtual sobre vTigerCRM
mércores, 8 de outubro do 2014
A Aula
TIC PEME da Universidade de Santiago, Campus de Lugo, está a
organizar a nova edición, a oitava xa, dun obradoiro formativo sobre
as posibilidades de comunicación (amplas e variadas)
profesional-cliente dunha ferramenta de software libre que constitúe
unha alternativa independente e aberta, altamente eficaz e
competitiva, das plataformas de software privativo SugarCRM e
Salesforce.com. Falamos de vTigerCRM,
un paquete de recursos que, entre outras cousas, pon ao noso alcance
ferramentas de informes, portal para clientes e un plugin para
Outlook.
O Taller Virtual sobre
Xestión de Relacións con Clientes con vTigerCRM, organizado pola
Aula TIC PEME, terá unha duración de 50 horas e un formato
“totalmente práctico”. A actividade dará comezo o vindeiro 7
de novembro de 2014 para rematar o 21 de decembro de 2014. O prezo
xeral é de 50 euros. Os alumnos e ex-alumnos da Universidade de
Santiago de Compostela contan cun desconto do 50% sobre o prezo
xeral. En relación cos destinatarios, este curso está dirixido
principalmente a PEME e autónomos, pero ábrese tamén a calquera
profesional ou estudante interesado na materia.
Ao rematar o curso,
outórgase un título acreditativo da aula TIC PEME da Universidade
de Santiago de Compostela (USC) a aqueles participantes que o
superaron de forma satisfactoria.