A Academia Galega de Ciencias e o CPEIG queren unha investigación máis visíbel
luns, 29 de setembro do 2014
A semana pasada uniron forzas en Santiago dúas
frontes profesionais ligadas ao coñecemento e ao progreso: as novas
tecnoloxías da información por unha banda e as ciencias e a
investigación pola outra. O obxectivo foi basicamente o de fomentar
máis traballo conxunto e tirar partido do rico potencial de
colaboración entre informáticos e científicos, un potencial
aplicábel a todas as frontes e a todos os elos das cadeas
investigadoras. Sobre
isto baseouse o acordo marco asinado entre o Colexio Profesional de
Enxeñaría en Informática de Galicia (CPEIG) e a Real Academia das
Ciencias. No acto participaron cadanseus presidentes, Fernando
Suárez e Miguel Ángel Ríos, respectivamente.
Outro dos obxectivos do convenio foi o de difundir a
ciencia na nosa terra, amais de favorece o seu achegamento ao sistema
produtivo galego. Máis en detalle, o CPEIG comprometeuse “a
colaborar coa RAGC na difusión social da ciencia, especialmente
naquelas actuacións tendentes a aproximar o coñecemento ao sector
produtivo”. Pola súa banda, a RAGC porá ao servizo do CPEIG o seu
coñecemento no eido científico-técnico. Ademais, as dúas
entidades poderán acordar concorrer conxuntamente a convocatorias de
financiamento público.
O texto rubricado fixa que a RAGC concederalle ao
CPEIG “a condición de entidade colaboradora”, que se fará
constar explicitamente na súa páxina web, así como nos programas e
carteis anunciadores das actividades nas que participen ambas
entidades. O acordo, que ten unha vixencia de dous anos, inscríbese
na liña de traballo do CPEIG de colaboración con outros organismos
a prol dun maior coñecemento do ente colexial e da difusión dunha
imaxe positiva da profesión. A sinatura tivo lugar na sala de xuntas
do Pazo de San Roque en Santiago, sede da Academia.