55 empresas e colectivos confirmaron xa a súa presenza activa na feira Culturgal
luns, 16 de xullo do 2012
A feira Culturgal, centrada en
dar a coñecer o potencial da nosa industria cultural como motor dunha nova orde
de actividade produtiva baseada no coñecemento e na innovación, conta xa, para
a súa celebración (do 30 de novembro ao 2 de decembro), co apoio de 55 empresas
e colectivos con espazo de seu no recinto (o Palacio de Congresos de
Pontevedra). A cifra, avanza a organización, é todo un logro para os tempos que
corren, de crise económica e recortes constantes á cultura. De feito, xa se
cubriu o 78% do espazo expositivo tres meses antes de que remate o prazo para o
aluguer de stands.
Por outra banda, e polo que respecta á Tenda de Culturgal, dicir que os
libreiros pontevedreses Manuel Seijas e Anxo Paz, encargados de xestionar o
local na edición anterior, resultaron unha vez máis gañadores do concurso para
a xestión do espazo común de comercialización. A organización valorou a súa
experiencia noutras feiras, que a proposta proveña dun colectivo de empresas e
que ambas estean radicadas en Pontevedra.
Volvendo ás entidades que xa confirmaron presenza na feira, dicir que se trata
de colectivos e empresas vinculadas ao sector da
creatividade e todas elas cunha arela común: dar a coñecer unha longa serie de
ideas innovadoras e establecer múltiples e variadas ligazóns de colaboración
con outras asociacións e empresas. Esta actividade, sinalan fontes de
Culturgal, amosa as claras o potencial da feira como elemento vertebrador que contribúe a
xerar ideas, buscar solucións compartidas e visibilizar a importancia do sector
como motor económico e como fonte de innovación e emprego cualificado.
Segundo
se fan saber nas bases da feira, todas as empresas, persoas, asociacións e
outras entidades que produzan, desenvolvan, difundan, xestionen ou comercialicen
produtos e servizos culturais no ámbito galego ou dende Galicia poden alugar un
stand. O prazo remata o 10 de outubro,
pero a organización advirte que os espazos se escollen por orde de contratación
e lembra que este ano se ofrecen facilidades no pagamento dos stands, cunha nova opción: as empresas
poden formalizar a contratación de espazo en calquera momento por 100 euros e
abonar o resto unha vez remate a feira, beneficiándose da oportunidade
comercial que supón o propio evento.
A organización de Culturgal quere facer fincapé, unha vez máis, na capacidade
que ten o encontro para unir mundos, o antigo e o novo, o analóxico e o
dixital, a palabra escrita e a imaxe que viaxa dun aparello a outro: “A gran festa da cultura galega, que en 2011 estivo
ateigada de público, encherá o vindeiro inverno unha vez máis a cidade do Lérez
de música, literatura, creación audiovisual, danza, teatro, deseño e novas
tecnoloxías”. Para quen desexe facer un achegamento máis estreito á realidade do
encontro, dicirlle que as redes 2.0 ferven de información e imaxes sobre o
evento, dende Flickr a Vimeo, pasando por Facebook e Twitter.